ليه كده؟؟؟؟

مش قادره افهم

بجد مش قارده افهم و لا استوعب ...مهما حاولت اركز عشان اقدر افهم و استوعب ليه كده برده مبقدرش اوصل للسبب 

ليه بجد فيه ناس كده ...ليه فيه ناس مفيش جمله يقولوها الا و فيها سب او دعا علي حد حتي و ان كان هزار بين الاصحاب 

و حتي الاغراب

ليه انتشرت ظاهره الشتيمه و كترت قووي في ألش الشباب

بقت موده صعبه يا ناس ..انك كل ما تفتح صفحه او تتكلم مع حد او تقري حتي نكته لازي نلاقي فيها سب و دعا علي الناس (حتي لو كانت وهم) و تريقه

حريه رأي!! ...ماشي بس ده برده ميديش حد الحق انه يشتم او يتريق او يدعي علي حد

احنا اكبر من كده ...لازم لغه الحوار بينا تبقي افضل من كده و الهزار افضل من كده

لازم نفهم كويس انك مش روش و لا كوول لما تشتم حد او تدعي عليه

ممكن ناس تشوف اني معقده و تقول ايه يعني 

بس احب اقولكم لأ مش ايه يعني 

لانه الصح انك تحترم اللي قدامك سواء كنت جد أو بتهزر معاه او حتي متعصب

مفيش داعي اننا نغلط في حد

طب اقولكم فكروا في دي كويس:

كلنا عارفين ان فيه ملكين بيكتبوا كل كلمه بنقولها ...فكروا بقي الشتيمه و التريقه دي بتتكتب في انهي كتاب؟

و فكروا كمان هتقولوا ايه قدام ربنا لما تيجوا يوم العرض عليه تقروا الكتاب ده؟

انا مش هرد و هسيب الرد عليكوا انتوا و كل واحد و ضميره بيقوله ايه ؟؟

انا بس لاحظت ظاهره ضايقتني و حبيت الفت نظركم ليها ...

يارت نغير من نفسنا و من اسلوبنا في الحوار خصوصا اننا في شهر كريم و دي اكبر فرصه اننا نغير نفسنا للاحسن 

و اخر حاجه احب اوصلهالكم عمر الشتيمه و التريقه كانت افضل طريقه للتعبير عن غضب او فرح او هزار و انما بالعكس ده الاسلوب ده ممكن يكون من اهم الاسباب اللي بتكون سبب مشكله كبيره او اذيه كبيره لشخص ما

رمضان كريم

كل سنه و انتوا طيبين
رمضان جه السنه دي زي كل سنه و احنا مبسوطين
بس اللي يحيرني بجد ليه متكونش السنه كلها رمضان و لو بشكل بسيط
طبعا مفيش شك ان رمضان شهر عظيم و ليه متعته الخاصه خصوصا اننا بنقرب فيه اكتر من ربنا
بس فيه مظاهر معينه مبتظهرش غير في رمضان
زي مثلا (و من غير تريقه) اناره الشوارع الجانبه ....يعني في رمضان بس بيمنوا علينا بيه بالنور اما في الايام العاديه مش مشكله رغم اننا بنحتاج للاناره طووووووووووووووول السنه


موائد الرحمن ...طبعا احنا مش محتاجين نصوم طول السنه عشان نفطر الصائم و نحس بالغلبان بس هيجري ايه لو عملنا موائد للغلبان طول السنه ده فيها ناس ياعيني بتنام مش لاقيه تاكل


بتكتر فيه التبرعات و الاحسان (و ده مطلوب) بس احنا محتاجين نحس اكتر باللي حوالينا يعني اللي اقصده منكتفيش برمضان و يبقي الاحسان علي اد الامكان


الواحد بيحس ان الغلبان بيستني بفارغ الصبر للمناسبات دي زي رمضان و الاعياد عشان يعرفوا يفرحوا اولادهم لما احنا ممكن (طبعا كل واحد عل اد امكانياته) ممكن نساعدهم من فتره للتانيه و لو بحاجه بسيطه


طبعا دي بعض النماذج مش كلها ده لسه فيه كتييييييييييييييير بس انا مش حابه اطول عليكوا


و عايزه اقولكم ...رمضان كرييييييييييييييييييييييييييم ^_^

الحب

ما هو الحب؟وكيف يكون الحب؟

يعتقد الكثيرون ان الحب هو عباره عن عشق بين شخصين رغم اننا ان نظرنا حولنا لوجدنا شتي انواع الحب اعظمها و اولها هو حب الله و يليه حب الام لابنائها

و كذلك نجد حب الاخوه و حب الطبيعه و حب العشاق و غيرها

اذا كيف يكون الحب؟

الحب افعال قبل الاقوال

فالحب اهتمام و رعايه و سعاده 

هو ان تعتني بما تحب و ترعاه و تتمني له الافضل 

ان تشعر بالسعاده لمجرد رؤيته سعيد 

ان تبذل قصاري جهدك لرؤيته بأفضل حال

فاننا نجد الكثير و الكثير من المحبين الذين يكتفون بذكر الكلمه و لكننا لا نشعر بها صادقه و نابعه من القلب

لقد صدق الكثيرون حين قالوا ان الحب مؤلم لان الحب تضيحه بسعاده 

نصيحه مني اخواني و اخواتي ان كنتم تحبون فكروا بمحبوكم ايا كان فلا مكان للحب داخل شخص اناني

مجرد مشاهد و لكن ذات معني ..

المشهد الاول:
لما جتلي سيندي (القطه الكبيره خالص) علي غير العاده من غير متخاف من الميه و هي فرحانه قوووي و لما مسحت عليها بشويه ميه قال يعني حمتها و علي غير العاده برده جتلي فرحانه و قعدت تلعب مبسوطه و مزقتته


المشهد التاني:
لما جه زيكو (القط التاني) و كنت متضايقه قوووي و مخنوقه و قاعده في السرير جه طبطب عليا و قعد جنبي كأنه بيقولي متزلعيش 


المشهد التالت:
ساسو (القطه التالته) قطتي و حبيبه قلبي بقالها يجي شهر و نص زعلانه مني معرفش ليه بس مره واحده جت تلعب معايا و رجعت تنام جنبي و هي مبسوطه 


المشهد الرابع:
فرافيرو (القط الرابع و اخر العنود ابني حبيبي) كنت زعلانه منه قووي و مخصماه و قولتله انا زعلانه منك و مخصماك و جه ورايا عمال يعيط و نط عليا و حضني كأنه بيعتذرلي


كلها مشاهد بسيطه و ممكن تبان لبعض الناس انها هايفه بس بالنسبه ليا اعظم لحظات ممكن الواحد يتعرضلها في حياته لاننا من خلال الكائنات البسيطه و الضعيفه دي بنفتكر ان ربنا موجود في كل وقت
رزق الحيوانات دي من رزقنا يعني احنا بنمثل لهم مصدر رزق و بيات و نفس الوضع لكل الكائنات الحيه سواء زرع او سمك او حيوانات ربنا بيرزقها يا اما عن طريقك او طريق غيرك
لما تتأمل في قطه او كلب او حتي طفل صغير ازاي بيستكشف الدنيا اللي حواليه و تلاقي نفسك بتسبح ربنا من كل قلبك و البسمه ملت وشك
لما يبقي بحر من حسنات عايش معاك في البيت او قريب منك و لو حتي علي السلم و تقول الحمد لله 
لما تبقي قاعد مهموم و زعلان و تلاقي حاجه جميله زي دي جايه تطمنك و كأنها بتقولنا ربنا موجود و كبير 
بجد احلي و امتع مشاهد و متقدرش تقول حاجه غير الحمد لله و سبحان الله و ربنا يخلي قططتي ليا ^__^


ملحوظه: اه انا عندي اربع قطط و بفتخر بيهم قولوا ما شاء الله و ادعولهم ربنا يرزقهم برزقنا ^_^

عادي ولا مش عادي

عادي تصحي كل يوم الصبح

عادي تقوم تفطر الصبح

عادي تنزل كل يوم للشغل

عادي تتبهدل في المواصلات عشان لقمه العيش

عادي ترجع بليل البيت تعبان و عايز تنام

بس مش عادي في وسط هموم و تعب اليوم يبقي كل همك انك تبتسم قدام الفقير قبل الغني

و مش عادي في كل الهموم و التعب اللي بتمر بيه تعطف علي المسكين و تزور المريض

مش عادي لما تخلص الشغل تعبان و تروح تزور قريب عشان صله الرحم

مش عادي ميكنش معاك غير اللي يكفيك بالكاد و تروح تدي غلبان

مش عادي تبقي محتاس و بتفكر في كل الناس

خلي افعالك تدل عليك و متفكرش في نفسك و لا اللي فيك

هو ده بجد قمه الاحترام انك تحسس اللي قدامك مهما كان غلبان ان الدنيا لسه فيها خير

فكر في اللي حواليك عشان تحس بيك

هو ده سر السعاده انك تكون انسان مش عادي

خليك انسان مش عادي ...خليك سوبر انسان

مش مهم

فعلا مش مهم ...مش مهم الناس تصدقك و لا لأ 
مش مهم الناس بتفكر فيك ازاي
مش مهم الناس بتراقبك و لا لأ و لا بتقول عليك ايه من وراك
عارفين ليه مش مهم
لانه طالما انت عارف انك مبتعملش حاجه غلط يبقي مش مهم الناس بتفكر فيك ازاي
لانه فيه اهم من الناس بيراقبك ...فيه ربنا اللي هيحاسبك 
فمش مهم الناس بقي يقولوا اللي قولوا و يفكروا في اللي بيفكروا فيه طالما انت مقتنع انك مبتعملش حاجه غلط
اوعي تزعل او تتضايق لو حد مصدقكش لانه مش مهم انه يصدق لانه ربنا شايف و عارف انك بتقول الصدق و لا لا
مش لازم تحلف 100 يمين انك صادق او كاذب لانه ممكن تكون صادق و بسهوله تلاقي اللي يكدبك فهتزعل اكتر و تتضايق
اعمل الصح و ميهمكش رأي الناس
اعمل الصح و ميهمكش صدقوك و لا لأ
لانك لو حطيتهم في بالك عمرك ما هتتقدم و هتشغل بالك بحاجات كتير مش مهمه زي انك تثبت انك صادق
اشغل نفسك انك تتقدم مش انك تثبت للناس حاجه
خليك واثق من نفسك و افتكر كويس جدااا ان ربنا موجود و متطلع علي اللي بتعمله

بقي عندنا رئيس هييييه

يا فرحتي بيكوا..بقي عندنا رئيس هيييييييه و الناس فرحانه و مبسوطه و كل واحد عنده طلب بقي بيبعتهوله
طب فكرتوا قبل كده ان الرئيس مش بايده كل حاجه و ان انت كمان ليك دور في تنفيذ الطلبات دي
يعني احنا بندور علي نظافه الشوارع و بنرمي الزباله في الشارع ...طب ازااااااااااي؟
بندور علي مساحات جميله خضراء و نرجع الزراعه المصريه زي ما كانت زمان...و مع ذلك بناخد المساحات الصالحه للزراعه و نبني عليها بيوت و عمارات ....طب برده ازاااااااااااااي؟
بندور علي الحريه و علي اننا لما نكلم حد يسمعنا و يحترمنا و في نفس الوقت لما حد يجي يكلمنا نبدء نشتمه و تدب خناقه كبيره فيها افظع الالفاظ....برده ازااااااي؟
و غيره و غيره من حاجات كتير نفسنا تتغير بس زي ما الرئيس في ايده دلوقتي انه يدرس المواقف و يعمل ما هو فيه الصالح باذن الله كل ده مش هيبقي بفايده لو احنا متغيرناش من جوه
يعني يبقي فيه نقطه نظام يعني نتغير يعني زي ما عملنا الثوره اللي كانت مثال للعالم كله لازم نعمل ثوره من جوانا ...ثوره التغيير الداخليه
بتحب بلدك يبقي لازم تتغير علشانها ...تشتغل اكتر من الاول مش تزوغ من شغلك...تحترم غيرك و تسمعه زي ما انت عايزه يسمعك...منرميش زباله في الشارع...يعني من الاخر كده احنا لينا دور اكبر من دور الرئيس في نهضه بلدنا و لازم نستغله صح