مين احسن 2012 و لا 2013 ؟؟

طبعا و قبل كل شئ 

كل سنه و انتوا طيبيييين و ياااا رب تبقي سنه سعيده علي الكل ^_^

ناس كتير من قبل السنه الجديده و هي عامله مقارنه بين السنه القديمه اللي قربت تخلص و السنه الجديده اللي هلت علينا ...و للاسف زي ما احنا متعودين كلهم بصولها من الناحيه السلبيه او هقولها بمنتهي الصراحه الناحيه السياسيه 

انا بقي حبيت ابصلها من ناحيتي الايجابيه .....

فحان وقت الاعتراف...بالرغم من انه فيه ناس كتير اشتكت من 2012 الا بالنسبه ليا كان من احلي السنين اللي مرت عليا عشان حصلتلي فيه احداث حلوه كتيييير 

طبعا علي رأسها و بلا خلااااف او اي شئ اخر ...خطوبه اختي الجميله الكبيره (مش كبيره قووي يعني تقريبا قدي كده بس علي اكبر :P ) الدكتوره ساره علي خطيبها الدكتور احمد ^_^

و طبعا الحدث التاني الاكبر اخيييراااااااا اختي الدكتوره هتاخد الشهاده الكبيره خاااالص البكالوريوس  هو اينعم في اول كام يوم من 2013 بس المجهود الاكبر كان في 2012 و اخيرا عشت لليوم اللي اشوف اختي فيه متخرجه و مخطوبه :P 

اكيد لكل واحد منا لحظات ندم في 2012 و بما ان 2012 كانت اول سنه ليا بعد التخرج (عدوها كده رغم انها سنه و نص) الا ان اكبر ندمي فيه ان ضيعت وقت كبير فيه سيبت للزمن و الغفله انها تسرق وقتي القيم عشان كده اول قراراتي اللي اخدتها مش هضيع وقت تاني في 2013 حتي لو هقضيها كورسات 

من برده الاحداث المهمه اللي سعيده بيها في 2012 الصحبه الحلوه اللي اتعرفت عليها و الناس الجدعه و الناس اللي قربت من قلبي بجد و حتي الناس اللي بعدت و اللي ظهرت علي حقيقتها انا مش زعلانه عليهم لان ربنا دايما بيختار الافضل لعباده و بعدين دي سنه الحياه و لازم نتعود عليها بايجابيه و لا ايه

و كمان مننساش فرفوري حبيبي اللي اتولد في اواخر 2011 يوم 22-12-2011 ..حبيبي و ابني و اخر العنقود القط بتاعي فرفور اللي ببرائته حياتي بتتملي سعاده

دي اهم احداث حصلتلي و  سعيده بيها و فخوره بيها في 2012 طبعا حصل كتير بس دول كفايه عليكوا و كل سنه و انتوا طيبين 

ربنا يخليكوا ليا يا احلي ذكريات و احلي حاجات حصلتلي في 2012 و يااا رب 2013 تبقي مليانه احداث و ذكريات احلي و اكتر بكتير تملي علينا حياتنا 

و البادي اظلم

للاسف دلوقتي احنا بقينا في مجتمع و عالم كل واحد بيقول فيه يلا نفسي بغض النظر عن كم الناس اللي ممكن يدوس عليهم عشان يوصل لهدفه 

للاسف النفوس البشريه بقت زي شياطين الانس بقينا بنلاقي الناس الوحشه في اي مكان نروحه بقت الطيبه عمله نادره و الشجاعه عمله نادره و التعاون و الخوف علي بعض برده عمله نادره 

مش قادره افهم ليه الناس بقت كده ..كنت اسمع و انا صغيره و اهلي بيحكوا عن زمان و ايام زمان ...ايام الحب و التعاون و المشاركه ..ايام الطيبه و حسن النيه و الكل بيخاف علي الكل ..ايام الوحده بين الناس و مفيش فرق بين حد و التاني

ايه اللي جري و ايه اللي غير الناس كده .... كل ما الزمن بيمر بينا الناس بتتغير للاسوء ومن اسواء لاسوء ...حتي الناس اللي كانت في يوم قلوبها صافيه اتغيرت مع الوقت

اد كده الشر بينتصر و اد كده الكره بيعدي ... ليه منبقاش اقوي ؟؟!

يعني لما واحد يتظلم او حد يأذيه و يجي ينتقم منه و كل ما حد يأذيه يقوم ينتقم منه و في الاخر مع كتر الانتقام نلاقيه اتحول بقي زي الشخص التاني اللي اذاه اول مره ...ليه بندي  فرصه للناس دي انها تأثر علينا

عمر ما الشر و لا الاذيه بيجيب حقنا بشكل كامل بالعكس ده فيه طرق تانيه افضل بكتير تخلينا ناخد حقوقنا بدون ما نأذي حد و نتحول للاسوء

لو كل واحد وقف قدام نفسه و روحه و قال انا مش عايز ابقي كده ...هوصل للي انا عايزه من غير ما أذي حد اكيد الحال هيبقي افضل

لازم يبقي فيه حب ما بينا و يبقي فيه تنافس شريف ما بينا في العمل او الدراسه او في البيت و حتي في الحب 

تخيلوا حتي الحب بيبقي فيه اساليب مش شريفه و مش هحكيها اكيد كلنا عارفينها من اللي بنشوفه في التليفزيون او حتي في الحقيقه

مش لازم نسيب كل ده يأثر علينا و يحولنا من بشر لشياطين الانس..لازم نحافظ علي روحنا الطيبه و صفاء قلوبنا بس بوعي ... مش لازم نسيب حاجه مرت علينا وحشه او حلوه الا و تكون لينا درس نتعلمه للمستقبل عشان نقدر نحافظ علي نقاء النفس البشريه 

احساس صعب

اصعب احساس في الدنيا تبقي محتاج تتكلم مع حد و الحد ده يكون قريب منك قووووي بس تلاقيه في عز ما انت محتاجه مبيفكرش غير في نفسه 

بجد مش عارفه ليه ...حاجه لاحظتها في الفتره الاخيره و كأن فيه سباق بين الناس و بعضها سواء في الفرح او حتي الحزن ان كل واحد يبين انه هو الاحسن , و انت تيجي تتكلم بمجرد ما تقول احساسك يقولك و انا كمان ...مفكرش حتي انك ممكن تكون في اللحظه دي بالذات محتاج تتكلم و تفضفض معاه ، بس ليه هو ميتكلمش رغم انه ممكن يكون بقاله زمن بيتكلم و بيفضفض و بمجرد ما تحصلك حاجه و تحتاج تتكلم تخرج اللي جوالك ميرضاش يديلك الفرصه دي (اللي بتحصل كل فين و فين)

زي ما تكون بتبكي جواك و مجبر تسمع بكي اللي قدامك اللي معندوش استعداد حتي انه يسمع اي صوت تاني غير صوته قال يعني مفيش غيره بيتألم

عارفه هتقولولي فضفضي لربنا و هو ده الصح علي فكره و انا برتاح لما بتكلم مع ربنا و عارفه اني مليش غيره اتكلم معاه و احكيله و ادعيله 

بس ده ميمنعش انه من الوقت للتاني الواحد بيحتاج يتكلم مع شخص معين و يسمعه و يعرف رأيه في مواضيع معينه.

مش بس في الحزن و الضيق علي فكره كمان في الفرح بقيت بحسها قوووي مع الناس قليل جدااااا لما تلاقي حد فرحنلك من قلبه ؛ ده حتي الناس بقوا بيستخسروا في الناس التانية الفرحه حتي كلمه المبرووك مش بيقولوها و لو من ورا قلبهم

مش عارفه ليه الناس بقت كده و لا انا لوحدي اللي حاسه بكده...كل واحد ملهي في حاله و مشاغله و كأن مفيش حد تاني بيفرح او بيزعل او بيتعب غيره 

محدش بقي حاسس بحد و محدش بقي عايز حد كله يلا نفسي

هقولكم علي حاجه بقي .... خليكوا برده ايجابيين خصوصا لو بيحصل معاك زي الكلام اللي فات و حاسس باللي حاسه بيه

عارفين ليه ..؟؟

عشان ربنا كبير و مبينساش حد ...خليك دايما جنبه و قول يااااارب...والله ربنا كريم بجد ^_^

ألم شديد

لا اجد ما يكفي من الكلمات لتعبر عما اشعر به
مع العلم الشديد ان ما اشعر به بمثابه لا شئ عن ما يشعر به اهالي ضحايا اليوم
نعم ...انها تلك الحادثه المفجعه التي هزت عرش مصر اكثر من اي حادثه اخري وقعت من قبل
فلقد خسرت مصر ما يقرب من 50 طفلا كان من الممكن ان يصبح بينهم عالما او كاتبا او سياسيا او مخترعا ....الي اخره !
خسرت اليوم مصر خساره فاضحه .... لقد خسرت مصر المزيد من ابناءها نتيجه لظلم و اهمال تجاه ابناءها 
اجد نفسي بلا مفر الا ان افكر ان ذلك نتيجه لاهمال نظام سابق و نظام جديد حالي كلاهما يتصفان بإهمال موردهما الاساسي و هم شعب مصر
لقد زاد الاهمال و الظلم في التمادي في حق هذا الشعب العظيم متخيلين ان اننا سنصمت و سنكتفي بالبكاء
لقد زاد الوضع عن الاحتمال ...فلقد زادت الاهانه بمقتل اطفالنا علي يد الاهمال
حقا لا اجد كلاما يصف شعوري غير ان قلبي يتمزق مثل كل المصريين الا اننا لن نتمكن ابدا من الشعور بنفس شعور اولياء امورهم الذين فقدهوا ابنائهم اليوم
لا اجد الا ان اصف مدي اشمئزازي من تلك الدوله التي تتمادي في اهانه ابناءها و التي تنافق العالم علي حساب مستقبل اولادها و كرامه شعبها 
فالامس كنا نبكي علي ابناء غزه و اليوم نبكي علي ابناءنا... ألا يكفينا بكاءاً و آن اوان التصرف و المواجهه  

الخوف

من غير لف و لا دوران

متخليش الخوف قدامك يقف بينه و بينك...متخليش الخوف يفضل عائق بينك و بينه

بينك اللي هو انت و بينه اللي هو حلمك 
يمكن ده كان السبب و لاول مره اعترف انه فضل واقف قصادي و خلاني اقف مكاني...مفيش تقدم.. مفيش جديد
حاولت اكون ايجابيه بس نسيت الخوف اللي عاش قدامي...الخوف من الفشل و الخوف من الضعف و الخوف من قله الخبره 
و نسيت ان الخطوه الاولي لنجاحك انك تهزم الخوف بايدك ...لازم تمشي و تهزم الخوف و تتقدم
دوس علي الخوف برجيلك و اول خطوه هي المواجهه ...واجه خوفك و واجه ضعفك بكره مصيره بين ايدك

افتكر كويس جدااا من فتره كنت في كورس للتنميه البشريه بيقولك فيها فيه نوعين من الخوف :الخوف الصحي و الخوف المرضي
الخوف المرضي اللي يخليك تقف مكانك متفكرش انك تتقدم و ترضي باللي في ايدك و خايف من المستقبل
اما الخوف الصحي انك تبقي عارف انك خايف و مع ذلك تقرر انك تهزمه و تتقدم لقدام 
انا اعتبرت نفسي بين البينين مسيبتش نفسي للخوف المرضي يخليني اقف مكاني و حاولت احسن من مهاراتي بس في نفس الوقت مكنش عندي الشجاعه المطلوبه اني اتنقل لمرحله الخوف الصحي و اقدم في الحاجه اللي نفسي فيها
لقيت الدنيا حواليا بتتقدم و انا زي ما انا قاعده مكاني (كان ده احساسي رغم انه مش صحيح) كان نفسي في حاجه بس معرفتش اوصلها ازاي و كنت فاكره الطريق اللي انا فيه هو الصح و اللي هيوصلني لحد ما فوقت و فكرت ليه انا زي ما انا محلك سر 
...عرفت من فتره بس خوفت اعترف اني نسيت اسعي في علي طول الطريق مش اكتفي بنص الطريق لحد ما شوفت فيديو فهمت نفسي اكتر و فهمت ليه انا وقفت و قررت اني افوق و اتشجع و اهزم الخوف...ممكن افشل و ممكن انجح بس المهم ااحاول و اكيد ربنا في يوم هيوفقني لان ربنا امرنا بالسعي 
انا بقول كده عشان عايزاكم انتوا كمان متدوش فرصه للخوف يهزمك لازم تسعوا و لازم تحاولوا و الاهم من ده كله لازم يبقي عندكم ايمان بنفسكم و بقدراتكم مهما كانت بسيطه و اياكم تفقدوا في يوم الامل 
و ده لينك الفيديو لعل و عسي يفيدكم زي ما فادني و اسمه 

Who Moved My Cheese

http://www.youtube.com/watch?v=tDNhEYpBPbY

نصيحه مني لازم تشوفوه لانه بجد روعه و مكنتش هحطه الا لو كان هادف و روعه

ايه اخر الاخبار؟؟

يااااااااااااااااااااااااااااااااااااه وحشتوني قووووووووووووي و وحشتني مدونتي حبيبتي بقالي زمن مكتبتش عليهامشاغل الحياه بقي بتلهي الواحد 

الا صحيح ايه اخر الاخبار معاكوا..!!!

تعرفوا الذ ما في الدنيا انك تغيب تغيب و اصحابكوا يبعدوا عنك ايام و شهور و يوم ما تتلاقوا تسألوا بعض "ايه اخر الاخبار؟"

و في الاخر تلاقي الاجابه النموذجيه اللي مفيش غيرها : "انا معنديش اخبار ...انت اللي عندك كل الاخبار" ...أو الاجابه التانيه المفضله عندي "زي الاهرام أو الاخبار" رغم اني معرفش ايه العلاقه بين الاتنينمين حصل معاه كده قبل كده ..؟ 

يا جماعه متحسسونيش اني غريبه عن الدنيا ...معقوله كل الايام و الشهور دي و تبقي اخبارنا زي ما هي مفيش جديد ...ليه الحياه وقفت ..الزمن واقف مكانه ساكت و لا انت اللي وقفت و لا مش لاقي كلام تقولوا و لا من كتر ما عندك اخبار و مغامرات مش لاقي حاجه تقولهابنعقد ساكتين ليه...حد فكر قبل كده يسأل نفسه انا ايه اخر اخباري؟؟ عملت ايه في الفتره اللي فاتت و يقيس مدي تغير الحال من حال لحال ...اكيد انا مش زي انا من شهر فات اكيد حصل كتير ...حتي لو مفيش جديد وعايشين في نفس الروتين ..اكيد بنقابل ناس و بنتعلم و بنكتسب خبرات ..اكيد مشاعرنا بتتغير من وقت للتاني سواء سعاده ،غضب ، حب ، يأس ، أمل ...الخ

حياتنا مليانه حاجات كتير ممكن تبقي بسيطه او في نظرنا و لا حاجه ؛ بس متقفش عندك و تخليها زي ما هي ..لو انت شايف ان حياتك وقفت مفهاش جديد ..دور علي الجديد و لو حاجه صغيره ...

بس المهم متسبهاش تقف و تدخل في غيبوبه الزمن .

طب ما تيجوا نعمل كده

كده و لا كده ??
ليه منبصش من ناحيه تانيه ؟؟
ليه علطول سودا قدامنا ؟؟
ليه احنا كده؟؟

تملي لما تحصل مصيبه و لا حاجه متعجبناش نلاقي الناس علطول بتبص من الناحيه اللي مش كويسه و مش بعيد نلاقيها بتعيط علي حظها الهباب و ان الموضوع ده فيه خراب و حاجات من ده كتييير

طب ليه منفكرش في الموضوع من ناحيه مختلفه ....ليه علطول بنفكر في الموضوع بشكل سلبي

قرار اتاخد و مش عاجبنا ...فعل حصل و مش عاجبنا ...مصيبه , كارثه حصلت و طبت فوق دماغنا

مش يمكن لو فكرنا في الموضوع من ناحيه تانيه هنلاقي ليها بعد تاني ...بعد اجمل بكتييير مستخبيلنا او هدف تاني ممكن يساعدنا نحقق بيه هدف في مستقبلنا

ليه المشكله لما تحصل بنقعد ندور علي الاسباب بشكل سلبي لما احنا ممكن لو فكرنا فيها بطريقه تانيه هنلاقي الحل واضح قدامنا زي الشمس

ليه لما حاجه وحشه بتحصلنا مبنفكرش فيها ببساطه و ايجابيه .. مش يمكن نستفاد منها و ابسط ايفاده لينا انها خبره بتتضاف لخبراتنا المستقبليه و اكيد هنستفيد بيها في يوم من الايام
لازم يا جماعه ناخد الامور ببساطه اكتر من كده مفيش داعي للعصبيه او اننا نفكر بسلبيه

ده حتي ممكن يأثر صحيا علينا انما لما ناخد الامور بشكل تاني و بهدوء اكيد بنستفاد و ربنا بيكرمنا بالحل 
و الكلام ده مش من فراغ و انما لاحظتها في مواقف كتير علي عكس لما بنتعصب و في الاخر بنتعب و فيه ناس مبتستحملش

لقيت اننا ناخد الامور بهدوء و بنظره مختلفة فعلا بتجيب من الاخر و منها برده بنكسب صحتنا 

تعالوا كلنا نعمل كده و ناخد امورنا كلها ببساطه و لا انتوا ايه رأيكو؟؟؟ 

^__^

ليه كده؟؟؟؟

مش قادره افهم

بجد مش قارده افهم و لا استوعب ...مهما حاولت اركز عشان اقدر افهم و استوعب ليه كده برده مبقدرش اوصل للسبب 

ليه بجد فيه ناس كده ...ليه فيه ناس مفيش جمله يقولوها الا و فيها سب او دعا علي حد حتي و ان كان هزار بين الاصحاب 

و حتي الاغراب

ليه انتشرت ظاهره الشتيمه و كترت قووي في ألش الشباب

بقت موده صعبه يا ناس ..انك كل ما تفتح صفحه او تتكلم مع حد او تقري حتي نكته لازي نلاقي فيها سب و دعا علي الناس (حتي لو كانت وهم) و تريقه

حريه رأي!! ...ماشي بس ده برده ميديش حد الحق انه يشتم او يتريق او يدعي علي حد

احنا اكبر من كده ...لازم لغه الحوار بينا تبقي افضل من كده و الهزار افضل من كده

لازم نفهم كويس انك مش روش و لا كوول لما تشتم حد او تدعي عليه

ممكن ناس تشوف اني معقده و تقول ايه يعني 

بس احب اقولكم لأ مش ايه يعني 

لانه الصح انك تحترم اللي قدامك سواء كنت جد أو بتهزر معاه او حتي متعصب

مفيش داعي اننا نغلط في حد

طب اقولكم فكروا في دي كويس:

كلنا عارفين ان فيه ملكين بيكتبوا كل كلمه بنقولها ...فكروا بقي الشتيمه و التريقه دي بتتكتب في انهي كتاب؟

و فكروا كمان هتقولوا ايه قدام ربنا لما تيجوا يوم العرض عليه تقروا الكتاب ده؟

انا مش هرد و هسيب الرد عليكوا انتوا و كل واحد و ضميره بيقوله ايه ؟؟

انا بس لاحظت ظاهره ضايقتني و حبيت الفت نظركم ليها ...

يارت نغير من نفسنا و من اسلوبنا في الحوار خصوصا اننا في شهر كريم و دي اكبر فرصه اننا نغير نفسنا للاحسن 

و اخر حاجه احب اوصلهالكم عمر الشتيمه و التريقه كانت افضل طريقه للتعبير عن غضب او فرح او هزار و انما بالعكس ده الاسلوب ده ممكن يكون من اهم الاسباب اللي بتكون سبب مشكله كبيره او اذيه كبيره لشخص ما